Framtida til Havforskingsinstituttet har blitt ei heit potet i havbyen Bergen etter at statsbudsjettet blei lagt fram tidlegare i haust.
I dag er instituttet fordelt på sju forskjellige bygg i Bergen. I 2020 vedtok regjeringa Solberg at Havforskingsinstituttet og Fiskeridirektoratet skal samlokaliserast i eitt nybygg på Dokken i Bergen sentrum.
I statsbudsjettet for neste år har regjeringa Støre foreslått å avslutte denne samlokaliseringa av dei to etatane. Det skal heller vurderast korleis ein kan vareta «dei bygningsmessige behova» til Havforskingsinstituttet.
– Regjeringa varsla i samband med revidert nasjonalbudsjett 2022 ein gjennomgang av planane for byggjeprosjekt i statleg sivil sektor. Målet var å redusere kostnadene til slike prosjekt, få betre kostnadskontroll og unngå ytterlegare press i norsk økonomi. På bakgrunn av dette foreslår regjeringa i statsbudsjettet for 2023 å avslutte samlokaliseringa av Havforskingsinstituttet og Fiskeridirektoratet, skreiv Nærings- og fiskeridepartementet i oktober.
Fleire lokalpolitikarar, institusjonar og politikarar skreiv ein kronikk i Dagbladet måndag 7. november.
– Dette er Noregs største miljø for havforsking, med ei rolle som berre blir viktigare i ei tid med auka temperaturar, med overfiske, forsøpling og forureining. I dag er HI spreidd på sju ulike adresser i Bergen, og mange av desse lokala er dårleg tilpassa dagens aktivitet, for ikkje å snakke om dei krevjande utfordringane som vi veit er rett om hjørnet», står det i kronikken, som blant anna er signert fylkesordførar Jon Askeland (Sp) i Vestland og Rune Bakervik (Ap), byrådsleiar i Bergen.
Onsdag 9. november blei instituttet og den planlagde samlokaliseringa på Dokken i Bergen tema under spørjetimen i Stortinget mellom Helge André Njåstad (Frp) og fiskeri- og havminister Bjørnar Skjæran (Ap).
I spørjetimen spurde Njåstad statsråden om han kom til å lytte til reaksjonen til lokalpolitikarane og snu i avgjerda om å avlyse samlokaliseringa.
– Det er rart regjeringa kan samlokaliserast i Oslo, medan havforskingsinstituttet må vere spreidd på sju lokalitetar. Eg er redd for signalet dette sender. No skal me femdoble veksten i havet, og då er det viktig at me har ei like stor satsing på forskinga, seier Njåstad til Nynorsk pressekontor.
Til Nynorsk pressekontor skriv Bjørnar Skjæran at han forstår at mange er skuffa over at samlokaliseringsprosjektet blir avslutta, men at med strammare økonomiske rammer, må dei prioritere strengare.
– Me skrotar ikkje planen om nye lokale for HI. Me ser at noko må gjerast. Derfor set me av 20 millionar kroner i budsjettet for neste år til å finna ut kva behov HI har framover, kor også behovet for nye lokale og kvar dei eventuelt skal plasserast vil inngå i utgreiinga. Ein bør fritt vurdera korleis Havforskningsinstituttets bygningsmasse bør vera.
Skjæran skriv at når det gjeld alternativ for HI i Bergen vil den nye konseptvalutgreiinga gi dei eit grunnlag for å ta ei avgjerd om kva som skal gjerast, tidsperspektivet avheng av kva løysing som blir vald.
– Det mest prekære i dette prosjektet er Havforskingsinstituttets behov for nye lokale. Dei har særlege behov for nye laboratorium.
– Havforskingsinstituttet og Fiskeridirektoratet er viktige delar av havbyen Bergen. Begge har ei sentral rolle i forvalting og utvikling av sjømatnæringane i heile landet og vil også ha dette i framtida. Fiskeridirektoratet har allereie funksjonelle lokale i dag og det gode samarbeidet skal framleis vidareutviklast, uavhengig av om dei arbeider under same tak, skriv Skjæran.