– No skrur me opp farten i vaksinasjonen, sa statsminister Jonas Gahr Støre (Ap) då han gjorde greie for koronastrategien frå Stortingets talarstol tysdag.
– Me skal få til eit taktskifte, lova Støre.
Han ber no kommunane om å stå klare til å setja 400.000 vaksinedosar i veka, i utgangspunktet ut april neste år. Regjeringa har bestemt at alle over 18 år skal få tilbod om ein tredje vaksinedose. Først i køen står personar over 65 år og helsepersonell.
Samtidig kom Støre med ei innstendig bønn til landets uvaksinerte:
– Det klare bodet mitt til alle som no har takka nei, er: Takk ja og vaksinar dykk, sa Støre.
Støre avkrefta tidlegare tysdag at det er aktuelt med ei ny nedstenging no. Den same bodskapen gjentok han frå Stortingets talarstol.
– I dagens situasjon meiner regjeringa det ikkje er rett eller forholdsmessig å be alle halda seg heime.
Regjeringa innfører likevel ei rekkje nasjonale påbod og tilrådingar for å redusere trykket på helsetenestene:
* Viss du bur saman med ein som har fått påvist koronasmitte, må du frå no av sitje i karantene til du har fått negativt testsvar. For å sleppe karantene, må vaksinerte teste seg på nytt seinast etter sju dagar. Uvaksinerte må teste seg dagleg i sju dagar med hurtigtest eller annankvar dag med PCR-test.
* Er du sjølv smitta, må du halde deg isolert i fem dagar i staden for to. Du må òg ha vore feberfri i 24 timar.
I tillegg kjem regjeringa med ei nasjonal tilråding om å bruka munnbind i kollektivtrafikk, taxi og på kjøpesenter der det ikkje er mogleg å halda avstand, og dessutan i kontakt med tilsette i helsevesenet.
Tilrådinga om å testa skuleelevar i område med aukande smittespreiing, blir ført vidare.
Støre varsla at regjeringa òg jobbar med nye innstrammingar i grensereglane. Dette vil det komme meir informasjon om seinare tysdag, sa han.
– La det ikkje vera nokon tvil – regjeringa er førebudd til å setja i verk nødvendige tiltak raskt dersom situasjonen tilseier det og me har solid fagleg dekning, sa Støre.